Kadam Ka Ped...

Kadam Ka Ped...

Karib 13 saal pehle ki baat hai maine ek kadam ka ped lagaya tha. Kadam ka hi ped kyon...? Uske pichhe ek kahani hai. Mere ghar ke bade me ek samay ek kadam ka ped tha jiski daliyon me mere bachpan ka kai yaadgaar lamha guzra hai. Chuki ghar banne ke dauran us ped ko kaat diya gaya tha aur mai kuch kar bhi nahi sakta tha. Akhirkar maine zid kar ke ek kadam ka ped laga hi diya. Magar use lagane ki anumati us jagah mili jaha mere purane ghar ka malba jama tha. Yakinan 3 feet gehre aur 2 feet chaude gaddhe khodane ke baad mitti ke darshan hue. Meri mehnat safal hui. Maine ek nanha sa kadam ka ped laga diya.
Us samay mai shayad 6th ka student tha aur ghar pe hi rehta tha. Mai roz us nanhe se ped ko pani deta usko dekhta. Bahut pyar karta us ped ko. Dekhte-dekhte wo ped bada hone laga. Uske tane mote hone lage aur daliya ghani. Ye wahi daud tha jab mai bhi apne secondary education khatm kar raha tha. 2009 me mere 10th board dete-dete mera lagaya ped phal dena shuru kar chuka tha. Waise to kadam ke phal bahuton ko nahi bhi pasand aata hai magar mere bachpan ke dino se hi mai unka deewana hua karta tha. Mai ab us ped pe chadh sakta tha, uski daliyon me baith kadam ke uss phal ka anand le sakta tha. Ek baar phir mai apne bachpan ko jeene laga tha. Uski daliyon me ghus ke uske falon ko khana apne aap me bahut achha anubhav tha.


Ab tak khushi-khushi chal rahe is kahani me alag-alag mod aane shuru ho chuke the. Mere 11th-12th ke dino me meri is ped se doori to nahi badhi thi magar nazdik aane ka waqt thoda kam ho chala tha. Pehle jaha din ke kai ghante us ped ki chhau me beet jate the ab pure din kabhi kabhi bina mulakat ke hi guzar jaya karte the. Fir  2011 ka wo saal jab mai higher secondary pass kar gaya tha. Ab hum dono ki zindagi achanak bade badlav ke muhane khadi thi. Ek taraf mere higher secondary ke kam marks dusri taraf mere lagaye ped ki daliyon ke karan padosiyon ke lagatar shikayat mere ghar walon ko pareshan kar rahe the. Khair ant me kuch nirnay aaya jo hum dono ko nagawara tha magar manna humari mazboori thi. Mera Bhopal jana tai kiya gaya aur mere ped ke daliyon ki chhatai. Hum dono ab door ho chuke the. Aisa nahi hai ki mulakatein band ho gai magar jo pehle har din hua karti thi ab saal me 2-3 bar tak simit ho gai. Meri avnati lagataar bani hui thi wahi dusri taraf mere ped ki unnati aur ye dono chijen mere parivaar ko khal raha tha. Khair hum dono har kuch sehte aage badh rahe.
Mai lagatar shehar badal raha tha magar mera ped bechara kya karta wahi akela reh gaya. Har saal uski chhatai ki jati.
Ab tak 13 saalon me bahut kuch badal chuka tha. Jis khali jagah me maine ped lagaye the wo ab 3 taraf se dusre gharon se ghir chuka tha. Lagatar padosiyon ke shikayat se maa ne ek kathod faisla liya. Ji haan aap sach samajh rahe hai, maa ne uss ped ko katane ka faisla liya. Vidambna dekhiye ki lagataar ghar se bahar rehta mai us din ghar pe mauzood tha jis din us ped ko kata gaya. Beete Ravivar dinank 21-10-2018 ko mere lagaye kadam ke ped ko kaat diya gaya. Mai bhi wahin tha chup chap khada. Uspe har pal hote prahar ko dekh raha tha magar kuch kar nahi saka......



Jaate-jaate mere pyare ped ne mujhe 2 baten sikhai pehla ki is baat se farak nahi parta ki aap kaha hai farak aapke humesha aage badne ki chahat me hoti hai. Yahi ek chahat thi ki wo kadam ka ped waha bhi khada raha jahan dusre ped nahi lag paa rahe the. Aur dusra ye ki aapko apne unnati ke sath apne liye usi hisab ka paristhitik tantra(ecosystem) vikasit karna hoga agar na kar sake to apne hisab ke paristhitik tantra me palayan kar jae anyatha aapka ant sunischit hai.
Khair jo kuch bhi ho ek baat to tai hai ki meri yaadon me hamesha jeevit rahega mera kadam ka ped.....